Árni vék ekki fyrir Þorgerði Katrínu

Þorgerður Katrín Gunnarsdóttir, varaformaður Sjálfstæðisflokksins, segir það af og frá að Árni Mathiesen hafi fært sig yfir í suðurkjördæmi til að hún gæti tekið fyrsta sæti á lista flokksins í suðvesturkjördæmi. Þetta sagði hún í viðtali við NFS eftir ríkisstjórnarfund í morgun. Árni Mathiesen, fjármálaráðherra og þingmaður Sjálfstæðisflokksins, lýsti því yfir í gær að hann hygðist færa sig um set og bjóða sig fram í fyrsta sæti á lista flokksins í suðurkjördæmi fyrir kosningarnar næsta vor, en Árni var oddviti lista sjálfstæðismanna í suðvesturkjördæmi fyrir síðustu kosningar. Þorgerður Katrín tilkynnti í kjölfarið að hún byði sig fram í fyrsta sæti á lista Sjálfstæðisflokksins í suðvesturkjördæmi fyrir þingkosningarnar næsta vor. Hún segir að það sé hins vegar alls ekki þannig að Árni hafi vikið fyrir henni. Þannig gangi stjórnmálin ekki fyrir sig.