Sjö á slysadeild eftir umferðarslys á Miklubraut

Sjö voru fluttir á slysadeild í nótt lítið meiddir eftir að ökumaður missti stjórn á bifreið sinni á Miklubraut nærri Rauðarárstíg. Bifreiðin reif niður 25 metra af járngirðingu á umferðareyju sem þar er og lenti svo framan á annarri bifreið sem kom úr gagnstæðri átt. Nota þurfti klippur til að ná ökumanni þeirrar bifreiðar út. Stykki úr járngirðingunni lenti svo á tveimur öðrum bifreiðum.

Við vinnu á slysstað ók síðan ölvaður ökumaður bíl sínum nokkuð glannalega í gegnum svæði sem lögregla hafði lokað af. Hann náðist skömu seinna og fékk að gista fangageymslur í nótt.