Fundað vegna öldu umferðarslysa

Félagasamtök, ráðuneyti og stofnanir efna til borgarafunda samtímis á sjö stöðum á landinu á morgun klukkan 17.15 undir yfirskriftinni „Nú segjum við stopp!" Tilefni fundanna er sú alda umferðarslysa sem skollið hefur á landsmönnum að undanförnu. Eins og fram hefur komið í fréttum hafa 19 manns látið lífið í umferðarslysum á Íslandi það sem af er árinu og má rekja mörg slysanna til áhættuhegðunar ökumanna. Segir í tilkynningu frá Umferðstofu að þörf sé á róttækri hugarfarsbreytingu í umferðinni og er það meðal annars markmið fundanna.