Aflaverðmæti jókst um tæpa þrjá milljarða

Aflaverðmæti íslenskra skipa jókst um tæpa þrjá milljarða á fyrri helmingi ársins 2006 miðað sama tíma í fyrra. Þetta kemur fram í nýjum tölum Hagstofunnar. Aflaverðmætið nam 40 milljörðum króna á fyrri helmingi ársins en var 37,3 milljarðar á sama tímabili 2005.

Aflaverðmæti botnfisks var í lok júní orðið 30,1 milljarðar miðað við 25,5 á sama tíma árið 2005 og er því um 18 prósenta aukningu að ræða. Þegar horft er til einstakra fisktegunda jókst aflaverðmæti ufsa um tæp 64 prósent og ýsu um 20 prósent milli ára.