Trúa að nýtt frumvarp skili þyngri refsingum

Formaður allsherjarnefndar Alþingis telur að nýtt frumvarp um kynferðisbrot muni skila þyngri refsingum í nauðgunarmálum.

Það var Samfélagið, félag framhaldsnema við félagsvísindadeild, sem stóðu fyrir hádegisfyrirlestri um nauðganir sem bar heitið "Nauðganir á Íslandi - hvað getum við gert". Fulltrúi karlahóps Feministafélagsins segir lögin ekki taka nógu vel á nauðgunum og segir nauðgara fá að meðaltali átján mánaða dóm.

Bjarni Benediktsson, formaður allsherjarnefndar Alþingis, segir þennan málaflokk vera á réttri leið með nýju frumvarpi en hann segir ekki bara við dómara að sakast að refsingar í nauðgunarmálum séu ekki þyngri. Hann telur hugsanlega leið að setja andlegan skaða fórnarlamba nauðgana inn í ákæru.

Mikið var rætt um forvarnir á fundinum en til þeirra þarf meira fjármagn.