Björgvin hlaut sterkari kosningu en hann átti von á

Björgvin G. Sigurðsson hefur tryggt sér fyrsta sætið í prófkjöri Samfylkingarinnar í Suðurkjördæmi. ,, Ég er ákaflega þakklátur fyrir þetta afgerandi traust sem ég hlýt. Ég fæ greinilega mjög góða kosningu í fyrsta sætið og mun sterkari en ég bjóst við" sagði Björgvin G. Sigurðsson þegar ljóst var að hann væri sigurvegari prófkjörsins.

Spurður hvort það sé ekki áhyggjuefni fyrir flokkinn að enginn í fimm efstu sætum skuli koma af Suðurnesjum, fjölmennasta svæði kjördæmisins sagði Björgvin: ,, dómur fólksins er fallinn og þegar við gengum til prófkjörsins vissum við að þetta gæti farið á ýmsa vegu. Við munum bara reyna að styrkja við þar sem vantar upp á og að sjálfsögðu einbeita okkur að því að vera fulltrúar fólksins alls í kjördæminu. Við erum að veljast öflugasta fólkið, burtséð hvar það býr í kjördæminu. "