Colin Jackson er harðstjóri

Tim Benjamin, fremsti 400 metra hlaupari Bretlands, segir að hann hafi aldrei kynnst öðru eins æfingaálagi eins og undir stjórn síns nýja þjálfara. Sá er enginn annar en Colin Jackson, fyrrum heimsmeistari og heimsmethafi í 110 metra grindahlaupi.

“Hann lætur mig leggja svo hart að mér að ég er stundum með æluna í hálsinum,” segir Benjamin. “Þetta er gríðarlega erfitt. Hann gerir miklar kröfur og ætlast til þess að þú standist þær. Ég hef aldrei kynnst öðru eins,” bætti hann við.

Jackson hefur snúið sér að þjálfun hlaupa eftir að farsælum ferli hans sem spretthlaupari lauk fyrir skemmstu.  Hann þykir með þeim strangari í bransanum – en jafnframt einn af þeim betri.