Myndir ársins 2006

Margt var um manninn á hinni árlegu ljósmyndasýningu Blaðaljósmyndarafélags Íslands sem opnuð var í Gerðarsafni í Kópavogi í gær. Geir H. Haarde setti sýninguna og að því loknu voru verðlaun veitt í 10 flokkum ljósmynda, m.a. fyrir fréttamynd, íþróttamynd, portrettmynd, skoplegustu mynd og þjóðlegustu mynd ársins. Í ár voru í fyrsta skipti veitt vegleg peningaverðlaun fyrir alla flokka en það var Glitnir sem styrkti þau verðlaun. Dómnefndina skipuðu þeir Ari Sigvaldason, Bjarni Eiríksson og Terje Bringedal, ritstjóri Verdens Gang í Noregi. Samhliða sýningunni verður bókin Myndir ársins gefin út en það er Edda útgáfa sem gefur bókina út og er hún styrkt af Menningarsjóði Blaðamannafélagsins. Á neðri hæð safnsins er einnig í gangi ljósmyndasýning á myndum frá Kárahnjúkum en það eru ljósmyndararnir Ragnar Axelsson, Páll Stefánsson, Þorvaldur Örn Kristmundsson, Kristinn Ingvarsson, Brynjar Gauti Sveinsson og Vilhelm Gunnarsson sem sýna þar myndir sínar. Sýningin stendur til 18. mars og á henni gefur að líta á um 200 myndir. Hér má sjá nokkrar af þeim myndum sem ljósmyndarar Fréttablaðsins eiga á sýningunni.