Kínverjar kynna sér íslenskar lausnir

Nýverið sótti sendinefnd frá samskiptaráðuneyti Kína, CTTC, Þekkingu heim. Tilgangur sendinefndarinnar var að kynna sér ýmsar íslenskar lausnir í málaflokkum stofnunar sinnar.

Kínversku gestirnir höfðu sérstakan áhuga á nýrri afritunarlausn, fyrir borð- og ferðavélar, sem Þekking er að setja á markað. Lausnin ber nafnið Reperio, sem er latína og stendur fyrir að „finna aftur“.

Í för með gestunum var Jóhann Pétur Malmquist, prófessor við Háskóla Íslands og samstarfsaðili ráðgjafarfyrirtækisins Key West Techno­logies. Í fréttatilkynningu frá Þekkingu er haft eftir honum að sérstakan áhuga Kínverjanna hafi vakið hversu framarlega Ísland er statt í tækni á mörgum sviðum.

Það var samstarf CTTC við Key West Technologies sem leiddi sendinefndina hingað til lands. Þekking starfar einnig með því fyrirtæki.