Drullugir upp fyrir haus

1. júlí 2007 01:15

Hljómsveitin Trabant á Rockness-hátíðinni í Skotlandi.

Hljómsveitin Trabant er nýkomin heim úr mánaðarlangri tónleikaferð um Bretlandseyjar þar sem hún spilaði á rúmlega tuttugu tónleikum.

Doddi trommari játar að vera orðinn ansi lúinn eftir törnina. „Það er ekki mikill tími til að slappa af. Menn eru komnir á fullt í alls konar dóterí annað. Manni hefði ekki veitt af því að fara í mánaðar sumarfrí úti á landi en það er ekki alveg í boði," segir Doddi. Drullumall á Glastonbury

með fatboy slim Trabant í stuði með Fatboy Slim, sem heitir réttu nafni Norman Cook. eftir tónleika á litlum stað í Brighton.

Lokatónleikarnir í reisunni voru á Glastonbury-hátíðinni, þar sem Björk og Gus Gus komu einnig fram. „Það gekk ágætlega. Þetta er svo fáránlegur staður og ekkert sem maður hefði getað ímyndað sér. Þetta var algjört drullumall og algjört kaos en ógeðslega gaman eftir á. Við komum heim drullugir upp fyrir haus. Allar töskurnar voru drullugar og þarna er engin aðstaða nema þú sért toppband. Allir aðrir voru þarna í skítnum saman. Þetta var mjög fallegt, þannig séð, og fyndin stemning á þessari hátíð," segir hann. Á undan Daft Punk

í london Trabant í almenningsgarði í London en þar í borg hélt sveitin vel heppnaða tónleika.

Dodda eru minnistæðir tónleikar á Rockness-hátíðinni í Skotlandi við hliðna á Loch Ness-vatninu. „Daft Punk voru á eftir okkur og við spiluðum inni í þessu frábæra setti þeirra. Þeir eru með brjálæðislegt „show" og þarna var tölvert meira af fólki að horfa á okkur. Við spiluðum í furðulegustu skúmaskotum á þessum túr og lentum í alls konar aðstæðum. Stundum kom enginn að horfa á okkur og stundum kom slatti af fólki. Það var rosalega gaman í London enda höfum við verið að spila mest þar. Þar var frábær stemning en annars var þetta gott fyrir auðmýktina." Emotional í Bretlandi

fatahreinsun frægra Ragnar Kjartansson, söngvari, hreinsaði jakkafötin sín að sjálfsögðu í Fatahreinsun fræga fólksins í London.

Síðasta plata Trabant, Emotional, kom út í Bretlandi um miðjan júní á vegum Southern Fried Records og hefur fengið góðar viðtökur. Framundan hjá sveitinni er að halda áfram að semja efni á nýja plötu, auk þess sem hún spilar á listahátíðinni LungA á Seyðisfirði laugardaginn 21. júlí. Þar koma einnig fram Bloodgroup, Skátar, Jeff Who? og Mínus.