Biðröð af sendiferðabílum á útsölu

Það var nóg að gera hjá sendiferðabílstjórum í dag, enda voru stórútsölur hjá nokkrum húsgagnaverslunum, svosem Húsgagnahöllinni og ÍKEA, þar sem boðinn var allt að áttatíu prósenta afsláttur.

Egill Aðalsteinsson, kvikmyndatökumaður okkar, var við ÍKEA í dag og þóttist heppinn að sleppa þaðan án þess að verða undir sófum eða hjónarúmum, sem fólk var að burðast með út úr versluninni. Margir hringdu í sendiferðabíla, en aðrir voru bjartsýnir og reyndu að hlaða ofan á þakið á heimilisbílnum.