Loksins fá Indíánarnir að vinna

Navajo Indíánar hafa reynst svo vel við að hafa upp á eiturlyfjasmyglurum sem reyna að komast til Bandaríkjanna frá Mexíkó, að ákveðið hefur verið að stofna fleiri slíkar sveitir. Indíánar voru fyrr á öldum frægir sporrekjendur og það hefur komið í ljós að sú kunnátta er ekki horfin.

Smyglararnir bera þunga bagga á bakinu yfir Arizona eyðimörkina og það er auðvelt fyrir Indíánana að rekja slóð þeirra. Að meðaltali gera þeir upptæk um fimmtíu tonn á ári af eiturlyfjum, mest maríúana. Í Arizona er fimmtán manna sveit Navajo Indíána sem kallaðir eru Skugga-úlfarnir. Yfirvöld hafa nú hug á að stofna fleiri slíkar sveitir, einnig á landamærunum að Kanada.