Kínverskt flugmóðurskip

Kínverjar segjast geta hleypt sínu fyrsta flugmóðurskipi af stokkunum árið 2010, sem veldur Bandaríkjamönnum miklum áhyggjum. Þeir óttast að Kínverjar hyggist keppa við þá um yfirráð á Kyrrahafi, og þá ekki síst í grennd við Tævan, sem Kínverjar segjast munu endurheimta með góðu eða illu.

Kínverjar hafa verið að auka framlög sín til varnarmála undanfarin ár. Landið á þegar fjölmennasta her í heimi og nú er lögð mikil áhersla á að búa hann fullkomnustu hergögnum sem völ er á. Kínverjar neita því að þeir séu að keppa við einn eða neinn. Framlög þeirra til varnarmála séu í fullkomnu samræmi við stærð landsins.

Engu að síður má búast við að hrollur fari um mörg nágrannaríki, ef kínverskt flugmóðurskip siglir út á heimsins höf eftir þrjú ár.