Best fyrir þig að flýja úr bænum

Þótt New York búar séu ýmsu vanir virðist alveg hafa soðið upp úr hjá þeim við að sjá og heyra á myndbandi þegar ráðist var á 101 árs gamla konu sem var á leið til kirkju sinnar. Árásarmaðurinn barði hana svo hrottalega að hún kinnbeinsbrotnaði, og rændi svo 32 dollurum úr tösku hennar.

Ótalmargir hafa gefið um það yfirlýsingar að þeir vildu gjarnan jafna um árásarmanninn og tíu milljónir króna hafa verið settar honum til höfuðs. Lögreglan hefur dreift myndbandi af árásinni, en varar við því að það sé mjög óskýrt og erfitt að bera kennsl á manninn. Því skuli menn gæta þess að ráðast ekki á alla unga svarta menn með kuldahúfur, sem þeir sjá.

Þótt lögreglan vilji ekkert um það segja opinberlega, hafa lögreglumenn í einkasamtölum lýst sig samþykka því að líklega væri best fyrir illvirkjann að flýja borgina, því hann eigi ekki von á góðu ef hann náist.