Lögðu hald á 13 milljarða íslenskra króna

Lögreglan í Mexíkó lagði í dag hald á 13 milljarða íslenskra króna við leit í höfuðstöðum eiturlyfjahrings í Mexíkóborg. Upphæðin er tvisvar sinnum hærri en lagt var hald á allt árið í fyrra. Þetta er mesta magn peninga sem nokkru sinni hefur verið gert upptækt í Mexíkó.

Lögreglan lagði einnig hald á ökutæki, vopn og talsvert magn eiturlyfja. Alls voru sjö einstaklingar handteknir og hafa þeir verið ákærðir fyrir að flytja inn ólögleg efni til amfetamíngerðar.

Stjórnvöld í Mexíkó hétu því nýlega að beita sér af enn meiri hörku gegn eiturlyfjahringjum í landinu.