Reglum Evróvisjón verður að breyta

Íslenska lagið Valentine Lost komst ekki upp úr undankeppni Evróvisjón í gærkvöldi. Eiríkur Hauksson söngvari, sagði að keppni lokinni alveg ljóst að austurblokkin, eða fyrrum Sovétlýðveldin, mynduðu með sér samtök, eða mafíu, og lög frá mið-og vestur evrópu ættu ekki möguleika.

Norðmenn sem einnig féllu út í gær segja að reglur söngvakeppninnar verði að breytast. Í norska dagblaðinu Aftenposten í dag er fjallað um hvernig keppnin sé að skiptast milli Austur- og Vestur Evrópu, þar sem Balkanskaginn hafi betur með svokallaðri blokkaratkvæðagreiðslu. Við þessari þróun verði að bregðast. Dönsku blöðin segja sömuleiðis að austurblokkin hafi jarðað danska lagið sem ekki komst áfram í gær.

Eiríkur sagði orðið tímabært að breyta fyrirkomulagi keppninnar og sagðist búast við sterkum viðbrögðum annarra Evrópuríkja við úrslitunum í gærkvöldi.