Örlög Wolfowitz ráðast í dag

Stjórn Alþjóðabankans hitti í gær PAul Wolfowitz, forseta hans. Hann er nú undir miklum þrýstingi um að segja af sér eftir að nefnd sérfræðinga á vegum bankans sagði að hann hefði gerst brotlegur við lög hans. Stjórn bankans mun ákveða örlög hans síðar í dag á öðrum fundi. Hvíta húsið styður ennþá við bakið á Wolfowitz, sem var áður aðstoðarvarnarmálaráðherra í Bandaríkjunum.

Engu að síður viðurkenndu þau í fyrsta sinn í gær að hann hefði gert mistök og að þau væru tilbúin að ræða um framtíð hans. Búist er við því að Wolfowitz eigi eftir að yfirgefa stöðu sína.