Fjögurra ára í klessubílaleik

Fjögurra ára snáði ók fjölskyldubílnum í ógáti utan í tvo kyrrstæða bíla á bílastæði í Reykjavík í gær, uns bíllinn drap á sér. Móðir drengsins hafði brugðið sér út úr bílnum og skilið hann eftir í gangi, en sá stutti fór að fikta og kom honum í gír með þessum afleiðingum.

Bílarnir sem hann ók á, skemmdust ekki mikið og engin gangandi vegfarandi átti leið um á þessu andartaki. Annars varð þrjátíu og eitt umferðaróhapp á höfuðborgarsvæðinu í gær, sem er langt yfir meðaltali, og verður akstursskilyrðum ekki kennt um.