Powell reyndi að telja Bush ofan af Íraksstríði

Colin Powell, fyrrum utanríkisráðherra Bandaríkjanna, hefur sagt frá því að hann reyndi að telja George W. Bush, bandaríkjaforseta, ofan af því að ráðast inn í Írak. Powell segist þá einnig telja að bandaríski herinn geti ekki komið á stöðugleika í landinu.

„Ég reyndi að forðast þetta stríð," sagði Powell á hátíð í Aspen um helgina. „Ég skýrði út fyrir honum afleiðingarnar af því að ráðast inn í land á þessum slóðum," bætti hann síðan við. Hann segir að nú ríki borgarastyrjöld og telur að eina leiðin til þess að útkljá hana sé með átökum.

Fyrr í morgun var sagt frá því að Bush væri að íhuga að tilkynna áætlun um hvenær hermennirnir myndu yfirgefa landið. Einnig að fækka hermönnum á þeim svæðum þar sem flestir láta lífið.

Ljóst þykir því að raddir efasemdarmanna um stríðið í Írak séu farnar að ná eyrum ráðamanna í Washington. Fjölmargir þingmenn repúblikana hafa einnig komið fram í fjölmiðlum undanfarna daga og sagt að þeir geti ekki lengur sætt sig við að bandarískir hermenn séu að deyja í Írak.

Í vikunni fara fram umræður um stöðu stríðsins í Írak í fulltrúadeild þingsins. Líklegt er talið að einhverjir þingmenn repúblikana eigi eftir að styðja við kröfur demókrata ef Bush kynnir ekki áætlun um að fækka hermönnum í Írak sem fyrst.