Þung umferð til Reykjavíkur

Gríðarmikil umferð er nú til Reykjavíkur. Umferð gengur hægt á Kjalarnesinu og Hvalfjarðargöngunum er sem stendur lokað vegna umferðarþunga. Það er í annað sinn í kvöld sem þeim er lokað vegna umferðarþungans.

Líkur má leiða að því að umferðarslysið við Vesturlandsveg fyrr í kvöld hafi átt sinn þátt í því.

Engu að síður er búist við því að göngin verði opnuð á ný innan fárra mínútna og umferðarteppan sem myndast hefur leysist. Þrátt fyrir miklar tafir taka ökumenn biðinni með stóískri ró, að sögn starfsmanns Spalar í gjaldskýlinu við göngin.