Bretar reka rússneska diplómata úr landi

Bresk stjórnvöld hafa rekið fjóra rússneska diplomata úr landi, vegna tregðu Rússa til að framselja meintan morðingja Alexanders Litvinenkos. Litvinenko var myrtur með geislavirku eitri í Lundúnum á síðasta ári. Rússar segjast munu bregðast við þessu útspili Breta.

Alexander Litvinenko var fyrrverandi KGB njósnari sem flúði til Bretlands . Hann var óvæginn gagnrýnandi Pútins forseta. Litvinenko veiktist hastarlega eftir fund á veitingahúsi í Lundúnum. Á fundinum var meðal annara Andrei Lugovoy sem einnig er fyrrverandi leyniþjónustumaður.

Bretar telja sig hafa sannanir fyrir því að Lugovoy hafi sett eitrið út í te sem Litvinenko drakk. Litvinenko dó kvalarfullum dauðdaga og á banabeðinu skrifaði hann bréf þar sem hann sakaði Vladimir Putin um að hafa fyrirskipað morðið.

Áratugir eru síðan rússneskir diplomatar hafa verið reknir frá Bretlandi.