Krónprinsessa Noregs - Marta Lovísa læknaði mig

Norska krónprinsessan Mette-Marit hefur upplýst að Marta Lovísa hafi læknað sig af slæmum nýrnakvilla með því að leggja yfir sig hendur. Mette-Marit segir frá þessu í opinberri ævisögu Mörtu Lovísu, sem er í vinnslu. Það vakti mikla athygli um allan heim þegar Marta Lovísa skýrði frá því að hún gæti talað bæði við engla og dýr.

Í bókinni segir Mette-Marit meðal annars um mágkonu sína; "Hendurnar hennar Mörtu. Um þær vil ég tala. Það hljómar kannski dálítið skringilega en hendur hennar eru einstaklega hlýjar. Það hafa auðvitað margir hlýjar hendur en það er eins og hún hafi litla sól í sér."

Mette-Marit segir að Marta hafi hjálpað sér mikið þegar hún barðist við illvígan nýrnakvilla. "Hún tók mig oft í meðferð. Ég var dálítið taugaóstyrk fyrst því allt í einu var nálægð okkar svo mikil. En það gekk vel og meðferðin hjálpaði mér mikið."