Hvítahúsmellur valda fjaðrafoki

Fjórðudeildarliðið Trentino 1921 á Ítalíu hefur vakið gremju stjórnmálamanna þar í landi eftir að það seldi fylgdarþjónustu í Austurríki auglýsingu á heimasíðu sinni. Þar geta lesendur komist í kynni við viljugar meyjar með einum músarsmelli.

Trentino fékk um 10,000 evrur fyrir auglýsinguna ef marka má frétt breska blaðsins Daily Mail og þykir stjórnmálamanninum Evu Berasi á Ítalíu auglýsingin vera afar ósmekkleg, en hún fer fyrir íþróttaráðinu í borginni.

"Mér finnst það alveg út í hött að knattspyrnulið skuli gera styrktarsamning við fylgdarþjónustu. Þessi atvinnugrein - ef hægt er að kalla þetta atvinnugrein - gengur út á að græða peninga á því að misnota konur og félagið er að hirða peninga sem koma inn á þessum rekstri," sagði Berasi og hélt áfram.

"Ég er móðguð og ég get ekki ímyndað mér annað en að allar konur í bænum taki í sama streng. Ég vona að Trentino sjái að sér og hafi það hugfast að félagið fær líka fjárhagslegan stuðning frá borgaryfirvöldum," sagði Berasi.

Þegar þetta er skrifað er búið að taka hlekkinn á fylgdarþjónustuna af heimasíðu liðsins, en auglýsingin frá Casa Bianca (Hvíta Húsinu) er enn á síðunni. Á síðunni kemur fram að Hvíta Húsið sé "heimili lostans" og er lesendum yngri en 18 ára bent á að skoða ekki innihald síðunnar.