Dylan og Megas eru áhrifavaldar

Tónlistarmaðurinn Sverrir Norland játar að meistararnir Bob Dylan og Megas séu báðir á meðal áhrifavalda á hans fyrstu plötu sem er nýkomin út.

„Ég get ekki neitað því að ég er mjög hrifinn af Dylan. Ég byrjaði ekkert að hlusta á Megas fyrr en fyrir svona einu ári. Ég á allt eftir hann núna," segir Sverrir, sem hefur spilað á gítar síðan hann var á unglingsaldri. „Ég hef verið í einhverjum hljómsveitum. Ein hét Furstaskyttan en við náðum aldrei að fara nógu langt með hana."

Sverrir, sem er 21 árs, starfaði sem hirðskáld Hins hússins í sumar og ferðaðist þá um með gítarinn og spilaði. „Ég hafði mikinn tíma til að semja þá en reyndar eru elstu lögin á plötunni frá 2006," segir Sverrir og bætir við að hann eigi enn fleiri lög á lager sem verði notuð síðar. - fb