Lampard ekki á leið til Inter

Frank Lampard er ekki á leið til ítölsku meistarana í Inter. Þetta segir umboðsmaður leikmannsins.

Fjölmiðlar á Ítalíu greina frá því í morgun að Lampard, sem á ár eftir af samningi sínum við Chelsea, væri búinn að ákveða að yfirgefa liðið eftir úrslitaleik Meistaradeildarinnar á miðvikudag.

„Enginn hefur talað við mig en ég og Massimo Moratti, eigandi Inter, þekkjumst samt vel," sagði umboðsmaðurinn. „Ég sá um kaup Inter á Paul Ince og Patrick Vieira. Ef það væri eitthvað í gangi myndi ég vita það."

„Staðan er sú að Frank á mikilvægan leik á miðvikudag og eftir hann mun hann eyða tíma með fjölskyldu sinni. Hann hefur ekki haft alvöru tækifæri til þess síðan móðir hans lést. Eftir það mun hann síðan fá sér sæti og ræða framtíðina í fótboltanum."