Amy Winehouse í annarlegu ástandi

Um helgina í miðborg Lundúna sást til söngkonunnar Amy Winehouse í annarlegu ástandi. Hendur hennar voru áberandi mikið rispaðar eins og eftir slagsmál og hún hljóp um göturnar elt af ljósmyndurum, datt síðan þess á milli skellihlæjandi eða hágrátandi.

Óttast er um heilsu Amy en ekkert hefur verið látið uppi um hvað hrjáir hana.

Heimildarmenn nákomnir söngkonunni segja að sannleikanum um heilsufar hennar sé vísvitandi haldið leyndum. Hún var flutt með hraði á sjúkrahús í síðasta mánuði eftir að hafa fengið verk fyrir brjóstið og faðir hennar sagði þá að hún hefði greinst með lungnaþembu.

„Við vorum dauðhrædd um að hún hefði fengið hjartaáfall," sagði heimildarmaður News of the World.