Inter vinnur - vegna Mourinho

Marcello Lippi, landsliðsþjálfari Ítala, segir að Inter Milan sé sigurstranglegasta liðið á næstu leiktíð í A-deildinni. Hann byggir spá sína fyrst og fremst á þeirri staðreynd að Jose Mourinho sé þar orðinn þjálfari.

Inter vann deildina þriðja árið í röð í vor og Lippi á ekki von á að breyting verði þar á næsta vetur.

"Ég kann vel við Mourinho og ég held að Inter sé sigurstranglegasta liðið fyrst og fremst hans vegna. Menn segja að hann sé harðjaxl, en leikmenn hans tala engu að síður mjög vel um hann. Það þýðir að hann hafi unnið mjög gott starf sem þjálfari," sagði Lippi.