Inter skoðar að lána Adriano

Inter skoðar nú möguleika á því að lána brasilíska sóknarmanninn Adriano í janúar. Samkvæmt fréttum frá Ítalíu hefur Adriano ekki mikinn áhuga á að snúa aftur til Inter eftir jólafríið.

Adriano var sífellt til vandræða undir stjórn Roberto Mancini, bæði innan og utan vallar. Hann virtist kominn á beinu brautina eftir komu Jose Mourinho en nú hefur allt fallið í sama jarðveg á ný.

Hann hefur ekki náð að halda sig frá skemmtistöðum Mílanó-borgar og brotið agareglur Inter oftar en einu sinni. Mourinho hefur látið hann verma varamannabekkinn og nú vill Adriano komast burt.

Brasilíska liðið Flamengo hefur lýst yfir áhuga en sögur segja að Adriano vilji halda áfram að leika í Evrópu. Inter vill ekki lána hann í annað ítalskt lið. Núgildandi samningur leikmannsins rennur úr gildi 2010.