Hrósar Adriano í hástert

Þjálfari Sao Paulo í Brasilíu er ekki í nokkrum einasta vafa um að framherjinn Adriano eigi eftir að nýtast liðinu vel á sex mánaða lánssamningi sínum frá Inter á Ítalíu.

"Ef hann verður kominn í form, mun hann verða í liðinu í fyrsta leiknum okkar," sagði þjálfarinn, en tímabilið í Brasilíu hefst í næstu viku. "Ég hef mikla reynslu af því að koma leikmönnum á rétta braut og hjálpa þeim að bæta sig og þannig verður það með Adriano. Hann verður hér í hálft ár og við ætlum að nýta okkur það til hins ítrasta," sagði þjálfarinn.

Adriano lofaði öllu fögru þegar hann kom til heimalandsins eftir tveggja ára baráttu við áfengi og þunglyndi á Ítalíu og hefur lítið sem ekkert spilað á þeim tíma.

Hann var hinsvegar ekki lengi að komast í fréttirnar eftir að hann sneri til heimalandsins, því hann var bæði myndaður með bjórdós á popptónleikum og lenti síðar í bílslysi um miðja nótt í Rio.