Mourinho nálgast 100 heimaleiki án taps

Jose Mourinho og hans menn í Inter Milan eru taldir afar sigurstranglegir þegar þeir taka á móti Catania í ítölsku A-deildinni á morgun. Mourinho stefnir þar á 99. deildarleikinn í röð án taps á heimavelli.

Mourinho tapaði ekki leik á heimavelli í deildinni þegar hann var með Chelsea og ætlar sannarlega ekki að fara að taka upp á því með Inter á fyrstu dögum sínum sem þjálfari liðsins.

Hann er þó ekki jafn upp með sér yfir þessum árangri og blaðamenn á Ítalíu.

"Þetta eru 98 leikir í röð án taps á heimavelli, en það skiptir mig ekki höfuðmáli hvort leikirnir eru 98, 99 eða 85. Ég sé fyrir mér að þessi rispa muni enda einn daginn, en þá skiptir í raun ekki máli hver endanlega talan verður. Fimm ár án taps er nokkuð góður árangur," sagði Portúgalinn.