Henin leggur spaðann á hilluna

Belgíska tenniskonan Justin Henin tilkynnti í dag að hún væri hætt keppni. Eins og fram kom hér á Vísi í morgun hélt hún blaðamannafund í heimalandi sínu í dag þar sem hún tilkynnti þessar óvæntu fréttir.

Henin er aðeins 25 ára gömul og er fyrsta tenniskonan í sögunni til að leggja spaðann á hilluna sem stigahæsta tenniskona heims.

"Þetta hefur verið mikið ævintýri en ég hef verið að hugsa um að hætta lengi," sagði Henin, sem hefur unnið sjö risatitla á ferlinum.

"Ég hef fengið að prófa allt sem hægt er að upplifa í tennis og hef lifað fyrir íþróttina. Ég er stolt af því sem ég hef afrekað," sagði Henin.

Hún á ekki von á að endurskoða ákvörðun sína. "Við mér blasir ný framtíð og ég mun ekki endurskoða þessa ákvörðun."