Ancelotti áfram hjá Milan

Adriano Galliani, varaforseti AC Milan, staðfesti í dag að Carlo Ancelotti yrði áfram við stjórnvölinn hjá félaginu á næstu leiktíð. Mikil óvissa hefur verið um framtíð Ancelotti í vetur en þeirri óvissu hefur nú verið eytt.

„Framtíð AC Milan er Carlo Ancelotti. Carlo er eins og hjólreiðamaðurinn Fausto Coppi, einmana í stjórn. Hann er eini maðurinn í heiminum sem hefur unnið Meistaradeildina bæði sem leikmaður og þjálfari. Hann þarf ekkert að sanna sig," sagði Galliani.

Jose Mourinho, þjálfari Inter, skaut hraustlega á nágrannaliðið á dögunum þegar hann minnti á að Milan væri eina liðið í sögunni sem hefði tapað úrslitaleik í Meistaradeildinni eftir að hafa komist 3-0 yfir. Galliani vildi lítið ræða það mál.

„Að svara Mourinho gerir ekkert annað en stækka egóið hans. Þess vegna mun ég aldrei svara honum aftur," sagði Galliani hálfpirraður.