Mourinho hugsar bara um að rífa kjaft

Portúgalinn Jose Mourinho virðist fara óstjórnlega mikið í taugarnar á mörgum á Ítalíu og sá nýjasti til þess að senda honum sneið er framkvæmdastjóri Catania, Pietro Lo Monaco.

Catania mætir Inter um helgina og Lo Monaco ákvað að tendra bálið fyrir leikinn en hann hefur áður sagst ætla að lemja Mourinho í andlitið með priki.

„Ég held að þetta tímabil hafi sýnt okkur að hann sé betri að tala utan vallar en inn á vellinum þó svo hann sé með eitt besta lið Evrópu í höndunum," sagði Lo Monaco.

„Það væri gaman að sjá Inter gera eitthvað í Meistaradeildinni þó svo nýjustu úrslit bendi til annars. Mourinho hugsar bara um að rífa kjaft þegar hann ætti í raun að hugsa um að vinna leiki. Flestir á Ítalíu þekkja hann bara fyrir að rífa kjaft og lítið annað," sagði Lo Monaco ákveðinn.