Tveir vinnumenn runnu af þaki Cowboys Stadium

Tveir vinnumenn á þaki hins gríðarstóra Cowboys Stadium mega þakka fyrir að vera á lífi eftir að þeir runnu af þaki vallarins þar sem þeir unnu að viðgerðum.

Þeir runnu talsverðan spöl þar til þeir stöðvuðust í rennunni neðst á þakinu. Hefðu þeir farið yfir hana hefði ekki þurft að spyrja að leikslokum.

Hvorugur mannanna var í öryggislínu eins og lög gera ráð fyrir.

Annar maðurinn missti meðvitund er hann fótbrotnaði við áreksturinn við rennuna sem er af stærri gerðinni eins og allt annað á þessum velli.

Báðir slösuðust þeir talsvert en eru ekki sagðir vera í lífshættu.

Einn maður hefur látist við gerð vallarins, einn lamast og ellefu aðrir slasast minna.