Mourinho: Nafnið mitt selur

Jose Mourinho þjálfari Inter neitaði í dag að tjá sig um hnefahöggið sem hann er sakaður um að hafa gefið stuðningsmanni Manchester United kvöldið eftir viðureign liðanna í Meistaradeildinni á dögunum.

Mourinho sat blaðamannafund á Ítalíu í dag og neitaði alfarið að tjá sig um atvikið.

"Ég vil ekki tala um þetta mál," sagði Mourinho og bætti við "Nafnið mitt selur og þið vitið það," sagði hann við blaðamenn og lét í það skína að málið væri stormur í vatnsglasi og búið til af blaðamönnum.

Breska lögreglan lýsti því yfir á fimmtudag að málið væri í rannsókn og litið væri á það sem minniháttar árás. Forráðamenn Inter hafa neitað þessum ásökunum.