Sigur hjá Inter í átta marka leik

Inter vann í kvöld stórsigur á Palermo, 5-3, og jók þar með forystu sína á toppi ítölsku úrvalsdeildarinnar.

Samuel Eto'o og Mario Balotelli skoruðu tvö mörk hvor í fyrri hálfleik og staðan því 4-0 fyrir Inter í hálfleik.

Palermo svaraði þó fyrir sig og skoraði þrívegis á átján mínútna kafla í síðari hálfleik. Fabrizio Miccoli skoraði tvö mörk og Abel Hernandez eitt.

En varamaðurinn Diego Milito skoraði fimmta mark Inter á 84. mínútu og þar við sat.

Inter er á toppi deildarinnar með 25 stig eftir tíu leiki, fjórum stigum á undan Juventus. Palermo er í sjöunda sæti deildarinnar með fimmtán stig.