Inter í viðræðum við umboðsmann Eto'o

Forráðamenn Inter vonast til þess að kamerúnski sóknarmaðurinn Samuel Eto'o verði orðinn þeirra í lok vikunnar. Viðræður milli Inter og umboðsmanns leikmannsins fóru af stað í gær og standa enn yfir.

Talsmaður Inter sagði við ítalska fjölmiðla í dag að hjá félaginu væru menn bjartsýnir. „Það er engin ástæða til annars en að búast við því að leikmaðurinn komi til félagsins," sagði hann.

Pep Guardiola, þjálfari Barcelona, tilkynnti stjórn Börsunga í gær að hann væri sammála þeirri ákvörðun að selja leikmanninn. Eto'o á eitt ár eftir af samningi sínum. Líklegt er að Zlatan Ibrahimovic fari til Barcelona í skiptum.