Ítalski skatturinn tók eyrnalokka Maradona upp í skattaskuld

Ítalska skattalöggan heimsótti Diego Maradona í dag á heilsuhæli í Ölpunum og tók af honum tvo eyrnalokka. Eyrnalokkarnir eiga að fara upp í skattaskuld kappans frá þeim árum þegar Argentínumaðurinn spilaði með Napoli.

Maradona lét eyrnalokkana góðfúslega af hendi en þeir eru 4000 evra virði sem er um 730 þúsund íslenskar krónur á núverandi gengi. Það fylgdi ekki sögunni hvort að Maradona hafi gengið með eyrnalokkana þegar skattalögreglan kom í heimsókn.

Fyrir þremur árum tók skattlöggan líka Rolex-úr af Maradona þegar hann heimsótti Napoli en þrátt fyrir þetta er skattaskuld, þessa 48 ára landsliðsþjálfara Argentínu á Ítalíu, enn talin vera um 37 milljónir evra eða um 6,7 milljarðar íslenskra króna.