Draumur Andy Murray á enda

Skoski tenniskappinn Andy Murray varð að sætta sig við tap gegn Bandaríkjamanninum Andy Roddcik í undanúrslitum Wimbledon-mótsins í kvöld.

Draumur Murray um að vera fyrsti Bretinn til þess að komast í úrslitaleikinn síðan 1938 varð því að engu en Roddick, sem eitt sinn var númer eitt á heimslista tennisspilara, mætir Svisslendingnum Roger Federer í úrslitaleiknum á sunnudag.

Federer er fimmfaldur meistari á Wimbledon mótinu og er talinn mun sigurstranglegri en ef hann vinnur setur hann met með því að landa fimmtánda stórtitli sínum á ferlinum.

Federer og Bandaríkjamaðurinn Pete Sampras deila metinu eins og er en báðir hafa unnið fjórtán stórtitla á ferlinum.