Beckham: Engar fréttir eru góðar fréttir

David Beckham viðurkennir að hafa ekki hugmynd um hvort hann þurfi að fara aftur til Bandaríkjanna eða hvort hann verði áfram hjá AC Milan.

„Það eru ekki neinar fréttir en engar fréttir eru stundum góðar fréttir," sagði Beckham sem lék með Milan í 1-0 sigri á Cagliari í gær.

„Ég mun gera allt sem í mínu valdi stendur til þess að vera hér áfram enda hef ég virkilega notið þess að vera hér," sagði Beckham.

Lánssamningur Beckhams við Milan rennur út þann 9. mars næstkomandi og engin tíðindi hafa borist af því að eitthvað þokist í viðræðum Milan og LA Galaxy.

„Ég hef spilað vel og líka sagt að ég vilji vera hér áfram. Ég hef gert allt sem ég get til þess að vera hér áfram. Það hefur verið mögnuð reynsla að spila með þessum leikmönnum sem og á San Siro. Vonandi verður framhald á því."