Milan staðfestir komu Beckham

AC Milan staðfesti í dag það sem lá reyndar þegar fyrir. David Beckham kemur aftur til félagsins í janúar og verður í láni í hálft ár.

Beckham sló í gegn hjá Milan er hann kom að láni til félagsins á sama tíma í fyrra.

Fabio Capello, landsliðsþjálfari Englands, hafði áður sagt að ef Beckham ætlaði að eygja von um að komast á HM yrði hann að koma til Evrópu og spila. Það hefur hann nú gert.

„Ég ætla að gera mitt allra besta til þess að komast í enska landsliðið fyrir HM. Að spila fyrir Milan mun hjálpa mér að ná því markmiði," sagði Beckham.

„Ég naut þess að spila fyrir liðið í fyrra og það verður gaman að koma aftur. Ég er þakklátur forráðamönnum LA Galaxy fyrir að gefa mér þetta tækifæri."