Jovetic: Sannur heiður að vera orðaður við United

Nafn framherjans unga Stevan Jovetic hjá Fiorentina var á flestra vörum eftir 2-0 sigur ítalska liðsins gegn Liverpool á dögunum þar sem Svartfellingurinn skoraði bæði mörkin.

Hinn 19 ára Jovetic hefur síðan verið orðaður við félagaskipti frá Fiorentina og félög á borð við Manchester United sögð vera að fylgjast náið með kappanum.

„Hjá Fiorentina hef ég allt til alls til þess að halda áfram að þróa minn leik og taka framförum. Ég er samningsbundinn félaginu næstu fimm ár og er ekkert á förum. Því er hins vegar ekki að neita að þegar ég les orðróma í dagblöðunum þar sem félög á borð við Manchester United eru orðuð við mig að þá fyllist ég stolti. Það er sannur heiður að vera orðaður við Manchester United en ég er eins og segi mjög ánægður í Flórens," segir Jovetic í viðtali við serbneska dagblaðið Blic.