Paolo Di Canio að taka við Poli Iasi í Rúmeníu?

Hinn litríki Paolo Di Canio er sagður vera nálægt því að taka við stöðu knattspyrnustjóra hjá rúmenska félaginu Poli Iasi en Daily Express greindi frá þessu í dag.

Di Canio sem gerði garðinn frægann með Celtic, Sheffield Wednesday, West Ham Og Charlton á Bretlandseyjum áður en hann sneri aftur til Ítalíu og endaði ferilinn með Lazio, félaginu sem hann tók sín fyrstu skref með.

Í mars árið 2008 tilkynnti hinn fertugi Di Canio um að hann væri hættur knattspyrnuiðkun og lýsti því jafnframt yfir að hann vildi snúa sér að þjálfun.

Di Canio sótti um stjórastöðuna hjá West Ham eftir að Alan Curbishley var rekinn á síðustu leiktíð en varð að láta í minni pokann fyrir Gianfranco Zola en Di Canio segir það vera draum sinn í framtíðinni að snúa aftur á Upton Park sem knattspyrnustjóri einn daginn.