Inter samdi við Milito

Diego Milito er formlega genginn í raðir Inter en hann skrifaði undir fjögurra ára samning við félagið í gær. Hann lék síðast með Genoa.

Þetta hefur staðið til í þó nokkurn tíma en ekki var gengið frá samningum frá því í gær. Þetta er staðfest á heimasíðu Inter.

Robert Acquafresca er nú genginn í raðir Genoa frá Inter en það var hluti af samkomulagi félaganna. Hann var í láni hjá Cagliari á síðasta keppnistímabili.

Þá er ekki langt þar til að Thiago Motta gangi frá sínum félagaskiptum til Inter en félagið er sagt greiða um 30 milljónir evra fyrir þessa tvo leikmenn.