Roma neitaði kauptilboði Chelsea í De Rossi

Forráðamenn Roma hafa staðfest að Chelsea hafi lagt fram kauptilboð í miðjumanninn Daniele De Rossi og að því hafi verið neitað enda sé leikmaðurinn ekki til sölu.

„Ég fékk símtal frá Carlo Ancelotti hjá Chelsea og hann vildi fá De Rossi til félagsins. Hann veit það hins vegar núna að De Rossi er ósnertanlegur og þó svo að kauptilboðið hafi verið hátt þá var því neitað," segir Bruno Conti hjá Roma í samtali við útvarpsstöðina Radio Radio í Rómarborg.

Ancelotti lét nýlega hafa eftir sér að Chelsea væri hætt á leikmannamarkaðnum í sumar og það má því búast við því að kauptilboðið hafi borist fyrr í sumar nema þá að Ancelotti sé búinn að snúast hugur.