Stærsta skattahneyksli Danmerkur í uppsiglingu

Stærsta skattahneyksli í sögu Danmerkur er líklega í uppsiglingu. Upphæðin nemur 1.000 milljörðum danskra króna eða yfir 20.000 milljörðum króna.

Fjallað er um málið í öllum helstu fjölmiðlum Danmerkur í dag. Samkvæmt upplýsingum frá Ríkisskattstjóra landsins hafa dönsk fyrirtæki og auðugir Danir flutt 1.000 milljarða danskra kr. til og frá 55 skattaskjólum víðsvegar um heiminn á undanförnum fimm árum.

Troels Lund Poulsen skattamálaráðherra Dana segir að hann hafi fengið áfall þegar hann sá upplýsingarnar frá skattinum og lofar því að aukafjárveiting muni fást til að rannsaka að fullu það sem gæti orðið stærsta skattahneyksli í sögu landsins.

Bæði Poulsen og skatturinn taka þó fram að ekki sé endilega um skattaflótta að ræða þótt fé sé yfirfært frá Danmörku til staða á borð við Cayman eyjar og Bahama.

Rannsóknin sem liggur að baki þessum upplýsingum er ein sú umfangsmesta sem danski skatturinn hefur efnt til en nú er verið að fara í gegnum gögn frá 20 bönkum og fjármálastofnunum í Danmörku.