Út­lit fyrir lökustu vín­fram­leiðslu í tæp sjö­tíu ár

Spáð er að franskir vínbændir framleiði um 3,4 milljarða lítra af víni í ár. Það væri slakasta uppskera þeirra frá 1957, að því er kemur fram í umfjöllun evrópska blaðsins Politico.

Tölfræðistofnun franska landbúnaðarráðuneytisins segir að jarðvegur um allt land hafi skrælnað í sumarhitanum. Hitabylgjur hafa skemmt uppskeru á mörgum vínekrum.

Uppskerutímabilið hefur aldrei áður hafist jafnsnemma í Champagne-héraði, sem kampavín er kennt við, og í ár. Bændur þar byrjuðu að tína ber í ágúst til þess að forðast að sykurmagn verði of mikið í þeim.

Hitaöfgarnar í sumar hafa einnig komið illa niður á maísuppskeru í Frakklandi og víðar í Evrópu í sumar. Umhverfisráðherra Frakklands áætlaði að sumarhitinn hefði valdið tíu til fimmtán milljarða evra tjóni. Stjórnvöld kynntu aðgerðapakka að andvirði eins milljarðs evra til þess að styrkja bændur fyrir helgi.