Johnny Depp hangir fram af svölum á náttfötum

Leikarinn Johnny Depp er í Feneyjum þessa dagana að taka upp nýjustu mynd sína, The Tourist. Leikarinn og kvikmyndatökuliðið eru ljósmynduð í bak og fyrir enda er myndin tekin út um alla borg þar sem er fjöldi ferðamanna á sveimi.

Þessi mynd náðist af Johnny þar sem hann hangir fram af svölum hótelsins þar sem persóna hans gistir. Fjöldanum sem horfði á brá nokkuð enda var leikarinn ástsæli ekki með öryggisbúnað.

Johnny lætur annars fara vel um sig við tökur myndarinnar og sagði einn aðstoðarmanna hans að hann eyði fúlgum fjár í ilmkerti sem hann láti brenna viðstöðulaust í vagni sínum og herbergi.

Angelina Jolie leikur á móti Depp í myndinni og er mikið talað um ástarsenur þeirra á milli. Brad Pitt er einnig á svæðinu þannig að það er sannkallaður stjörnufans í Feneyjum um þessar mundir.

The Tourist er spennumynd sem er leikstýrt af Florian Henckel Von Donnersmack, sem gerði þýsku myndina Líf annarra um árið.