Bleikjan mætt í Hraunsfjörðin

Bleikjan er mætt í Hraunsfjörðinn samkvæmt fréttum af vef Veiðikortsins og eru það frábærar fréttir fyrir þá sem sækja mikið í bleikjuna því óvíða á landinu er jafn gaman og á sama tíma jafn mikil áskorun að ná henni. Það hefur stundum komið fyrir að fiskurinn taki ekkert en sé í torfum um allt. Yfirleitt er besta ráðið við slíkar aðstæður að skipta bara nógu oft um flugu þangað til þú hittir á það sem hún tekur.

 

Þær flugur sem menn hafa notað við góðann árangur í sjóbleikju eru t.d. gamlar og klassískar eins og Black Zulu, Peter Ross, litlar Grey Ghost og Wolly Worm. Nýjar flugur sem hafa reynst mönnum drjúgar eru t.d. Bára Bleika, litlir Nobblerar og púpur, þá oftast með einhverjum rauðum lit í. En annað er gott að hafa á bak við eyrað. Þegar þú ert búinn að landa fyrsta fiskinum, gerðu að honum og kíktu á innihald magans. Og til þess að þú sjáir hvernig ætið lítur út í vatni, vertu með litla krukku meðferðis, settu magainnihaldið (ekki allt) í hana með vatni og hristu rólega. Með þessari aðferð veistu hvað bleikjan er að éta á þessum stað á þessum tíma. Bleikja er algjör tækifærissinni á fæðu og étur það sem er auðfengnast og gefur henni mesta orku.

 

Kynntu þér það sem bleikjan étur í vatninu og árangur þinn á eftir að verða betri og betri.