Farið að sjást í fyrstu laxagöngurnar

Það fer víst ekki á milli mála að laxinn er að mæta í árnar á suður og vesturlandi, þá líklega helst á leiðinni í þær ár sem eru þekktar fyrir snemmgengna stofna í samanburði við ár á svipuðum slóðum. Nægir þar að nefna t.d. Norðurá og Þverá/Kjarrá. Laxar sjást stökkva við hafnir og strandlengjuna við Reykjanes sem þýðir að fyrstu göngurnar ættu að renna í árnar um næstu mánaðarmót.

Það er umtalað hvað laxinn kom snemma í fyrra og margir sem vilja spá því að svo verði einnig í ár en það er spurning hvað vetrarhretið sem nú geysar fyrir norðan og austan hefur mikil áhrif. Áhrifin gætu að margra mati seinkað göngum eitthvað sem eru frekar neikvæðar fréttir en veiðimenn eru bjartsýnismenn og ég hef heyrt talað um það manna á milli að allri úrkomu bera að fagna svo það verði ekki annað þurrkasumar eins og í fyrra.

En það styttist í að veislan hefjist hjá laxveiðimönnum og framundan er líka gósentíð í vatnaveiðinni þegar það hlýnar aftur.